شرفتوا ونورتوا الموقع وأهلا بيكم في نقد كتاب جديد! المرة دي, أنا قررت أجرب أكتب المنشور بالعربي بما أن الكتاب اللي هنتكلم عنه مكتوب بالعربي. بالله حاولوا متدوروش على غلطات املائية عشان دي أول مرة أكتب حاجة بالطول ده زي نقد كتاب بالعربي, خلينا كدة لطاف مع بعضينا
طيب, زي ما أنتم عارفين, النهار ده هنتكلم عن كتاب اسمه "التجربة الفكرية لروح أمه" للمؤلف كيرلس بهجت. الكتاب عبارة عم مجموعة مقالات, اليدوي وكل مقالة بتتكلم عن نوع من أنواع كثيرة من السلوكيات النفسية. كيرلس بهجت كتب المقالات دي ونشرهم في كتاب بهدف أنه يبقى زي الدليل كده للناس عشان تعرف هما بيتعاملوا مع مين وازاي ممكن يكون بيفكر وازاي ممكن يتصرف, وكمان كيفية التعامل مع الشخص ده على أساس هو عنده انهي سلوك نفسي. هنتكلم الأول عن طريقة الكتابة اللي كيرلس استعمله.
كيرلس بهجت كتب المقالات بنفس طريقة كتابة بوستات على الفيسبوك, وبكده خلى المعلومات سهلة القراءة والاستوعاب, حتى كل مقالة منفردة مطولتش عن ثلاث صفحات, كمان اختار فونت كبير وواضح عشان الكلام يلزق مع القارئ. حاجة كمان أن كيرلس استعمل اللغة العامية بكل ألفاظها وتعبيراتها, فده أكيد بيساعد القارئ في سرعة الفهم, وخصوصا شريحة الشعب المصري اللي سنه ميتعداش الأربعين. ولكن للأسف (ودي حاجة غاظتني وأنا بقرأ) لقيت أخطاء املائية كتير شوية, فأضطر أني أقطع خط الفكر وأحاول أفهم هو كان يقصد يكتب ايه, بس بما أن طريقة الكتابة أشبه بمنشورات الفيسبوك ده متوقع, مع أني أنا شخصيا متوقعتش ألاقيها في كتاب.
ثاني حاجة هنتكلم عنها هو محتوى الكتاب, وده أهم حاجة فيه. كيرلس مسك عدة من السلوكيات النفسية وحللها معاك كأنه قاعد معاك على القهوة وبيديك ملخص لنماذج من الناس اللي موجودة حواليكم أو من القصص اللي بتحكوها سواء عن نفسكم أو الناس اللي في حياتكم. بيتكلم عن الحاجات اللي بنشوفها من الناس بفكر العلم النفسي, فبيعلمك أننا كلنا في الحقيقة مرضى نفسيين! يديك موقف من اللي بنشوفهم في حياتنا الاجتماعية ويفصصها لك ويقول لك كل حتة عبارة عن ايه, زي ما بيكون بيشرح نفسية الشخص ده. وأنا بقرأ, لقيت نفسي كل شوية بسترجع عن مواقف في حياتي لما اتعاملت مع سلوك من اللي في الكتاب, وبلاقي نفسي يا بضحك وبقول "أيوة! صح جدا وياما شفت!" أو أقول "ياه دي الشخصية المزعجة دي ليها اسم علمي؟", فغصب عنك هتلاقي نفسك قاعد بتتعرف على ناس قابلتهم في حياتك ينطبق عليهم التشخيص اللي في الكتاب, الا طبعا لو أنت "المش اجتماعي" اللي كيرلس بيفسره ومتعرفش حد من أساسه.
آخر حاجة التصميم بتاع الكتاب. جلد الكتاب ملفت للنظر, ولما تركز فيه تلاقي أنه مرسوم بنوع من السخرية, بتشوف شخص, مخه عبارة عن مقالات ومجلات, ومبتسم بس بضحكة كارتونية أو "مرسومة", وحواليه ناس وشوشهم "مرسومة" برضه وملهمش أي خصائص ثانية منفردة. أظن أن كيرلس بيبعت رسالة, وهي أن الشخص اللي يعرف المعلومات (المقالات اللي في المخ) يقدر يتعايش زي اللي حواليه وأحسن كمان, لأنه من برة شخص عادي جدا, أنما فيه دماغ بتفكر بطريقة مختلفة. ممكن برضه أن بما أن الكتاب ده فعلا تجربة كيرلس الفكرية, فالشخص اللي مرسوم هو كيرلس, وكل تجربة مع سلوك نفسي اتسجل عنده زي المقالة, اللي أنت دلوقت بتقراءها. عجبتني كمان أن في رسومات صغيرة تحت مقالات موجودة للتوضيح وللاستعمال الكوميدي, ده خلى الكتاب يحتفظ بأسلوب السخرية والهزار اللي هدفه مع شد اهتمام القارئ وبقاء المعلومات.
عجبتني فكرة الكتاب, أنها تعلم القارئ عن السلوكيات اللي بيقابلها في تعاملاته اليومية وتقول له يتصرف ازاي معاهم. وبخصوص النقطة دي, بالذات أن كيرلس كذا مرة جاب سيرة الاكتئاب وتدهور الحالات النفسية والشيزوفرنية وأمثال من هذا النوع من الأمراض النفسية, أتمنى أن كيرلس بهجت يكون كتب كتاب زي "التجربة الفكرية لروح أمه" بس عن الأمراض النفسية اللي الناس مش عارفة تستقبلها بتفكير مفتوح, زي الاضطرابات الغذائية واضطرابات القلق والاكتئاب وكدة. الناس بحاجة شديدة للتوعية عن الموضوع ده, وأنا شايفة أن لو اتقدم لهم بشكل زي الكتاب ده, هيفهموا ويمكن كمان يقدروا. فأتمنى أن كيرلس أو حد غيره يعمل كدة أن مكانش كيرلس عمل كدة خلاص (طبعا من غير الأخطاء الاملائية).
طيب, عشان نلخص ونقفل نقد "التجربة الفكرية لروح أمه," أنا لو هديه درجة من خمسة, أنا هديه 4.7 (متزعلش يا كيرلس بس الأخطاء الاملائية مقدرش أتغاضى عنها), وأنا أحب أديه توصية عالية وأتمنى أن كل الناس تقرأ الكتاب ده, جائز ممكن نرحم بعضنا شوية أو على الأقل نفكر قبل المرة اثنين لما نيجي نأخذ قرار أو نقول حاجة.
كل الشكر والحب لقرائي الأعزاء على قرائتكم النقد ده, واستمرار وجودكم معايا. أتمنى متكونوش اتضايقتم من ال"تجربة" بتاعتي وقولوا لي لو عجبكم النظام ده, وبالمرة لو عندكم اقتراحات عن أي كتب عربي عايزيني أقرأها وأقول لكم رأيي فيها, يا ريت تكتبوها في التعليقات هنا على الموقع أو على صفحة الفيسبوك, وطبعا كالعادة, تعليقاتكم ونقدكم مرحب بيهم. أشكركم على القراءة وهشوفكم المرة الجاية!
Hue Mann, over and out!! ;)